ગઝલનો વિષય છે


 

વિહરવું,રઝળવું મજલનો વિષય છે;
શમા જેમ ગળવું ગઝલનો વિષય છે.

ઠરી થાંભલો થઇ ગયેલી ગલીમાં
તમારું નીકળવું કતલનો વિષય છે.

નજાકત કે આફતની જો વાત છેડું;
તમારી સલૂણી શકલનો વિષય છે.

વિચારો ફરજ છે,લગાગા છે સુન્નત;
ને મક્તા’નું મળવું નફલનો વિષય છે;

ગઝલ મયપરસ્તી,ગઝલમય છે હસ્તી;
ગઝલ તો ગઝલ છે,સકલનો વિષય છે.

કલાકાર ઘુંટે,તલબગાર લૂંટે,
ઉભયનું પલળવું અમલનો વિષય છે.

ગઝલ ગાઈ જીવવું, ગઝલ ગાઈ મરવું-
અમારી સૂરીલી નસલનો વિષય છે.

થયે બાગ-’ફિરદૌસ’ સદીઓ ગઇ છે;
પલકભરમાં ફળવું અતલનો વિષય છે.